ජිනීවා හි මොනවද වෙන්නේ?

ජිනීවා හි මානව හිමිකම් කවුන්සිල‍යේ 25වන සැසිවාරයේ පළමු දෙසතිය දැන් අවසන් ය. එලඹෙන සතිය කුණාටුවට පෙර එලඹෙන නිසළතාවය මෙන් මානව හිමිකම් කවුන්සිලය තුළ ශ්‍රී ලංකාව පිළිබඳ වැඩි හැළහැප්පීමක් නැතිව ගෙවී යනු ඇත. ලබන සතියෙහි 18 සහ 19 යන දෙදිනයන්හි අන්තර් ජාතික මානව හිමිකම් සංවිධාන විසින් ශ්‍රී ලංකාව සම්බන්ධයෙන් සමාන්තර රුස්වීම් දෙකක් පවත්වයි. ඉන් එකක දී අනපේක්ෂිත සාක්ෂිකරුවකු යුද්ධ භුමියේ සිදු වූ කරුණූ ඉදිරිපත් කරනු ඇතැයි කියැවේ.

වෙනත් වාරවලදී මෙන් නොව මෙවර ලංකාන්ඩුව කිසිදු සමාන්තර රුස්වීමක් පවත්වන බවත් පෙනෙන්නට ද නැත. ලබන සතිය තුළ අමාත්‍ය සමරසිංහ ඇතුළු කන්ඩායම උත්සාහ කරනු ඇත්තේ වැට උඩ සිටින රටවල් සිය පාර්ශවයට නම්මවා ගැනීමට හෝ යෝජනාවට පක්ෂව ජන්දය ප්‍රකාශ කිරීමෙන් වැළක්වීමට ය. අවසන් සතියෙහි ශ්‍රී ලංකා දූත පිරිසෙහි නායකත්වය දරනු ඇත්තේ තානාපති රවිනාථ ආරියසිංහ ය.

වෙනත් වාරවලදී මෙන්ම මෙවර ද ශ්‍රී ලංකාව සම්බන්ධ යෝජනාව නොනිල වශයෙන් සාකච්ජා කිරීමට දෙපැයක සමාන්තර රුස්වීමක් කැදවන ලදී. එනමුත් දෙක උණුසුම් වාදවිවාද මැද සැසිවාර දෙකක් ලෙස සතර පැයක් ම ඒ සඳහා ගත විය. ලෝක දේශපාලන ප්‍රශ්ණ සාකච්ජා මේසයට ගැනෙන ආකාරයෙහි කැඩපතක් බවට මෙම සාකච්ජා පත් වෙයි. රාජ්‍ය තාන්ත්‍රික ලෙස නො එකඟතා ප්‍රකාශයට පත් කිරීමත් එඅයුරින් ම ඒවාට පිළිතුරු බැඳීමත් කැරෙන ආකාරය බලා අසා සිටීම සිත් වසඟ කරවන සුළු විය.

ශ්‍රී ලංකාව වෙනුවෙන් මෙම සාකච්ජාවන්හි දී වැඩි පුරම පෙනී සිටියේ අනුපිළිවෙලින් පකිස්ථානය, කියුබාව, චීනය, වෙනිසියුලාව සහ රුසියාව ය. ඔවුන්ට පැවරී තිබුනේ දැන දැනම, පරදින වාදයක කොටස්කරුවන් වීමට ය. ශ්‍රී ලංකාවේ වත්මන් තත්ත්වය සම්බන්ධයෙන් රාජපක්ෂ ආන්ඩුවේ ස්ථාවරය හා සමාන අදහස් ප්‍රකාශ කිරීම විනා කරුණූ ඉදිරිපත් කිරීමක් ඔවුන් අතින් නොකෙරුනු තරම් ය. එළෙස කරුණු මගින් මෙම යෝජනා කෙටුම්පත ඛන්ඩනය කිරීමට හැකියාවක් තිබුණේ නම් රාජපක්ෂ ආන්ඩුව ඒ වෙනුවෙන් මෙම සාකච්ජාවන්ට සහභාගි නොවී සිටින්නේ නැත. සුළුතර ආගම්වලට එරෙහිව කැරෙන අන්තවාදී ප්‍රහාරයන් නොසැළකිය යුතු තරම් ය; පැවැත්වෙන මැතිවරණ සාධාරණ සහ නිදහස් ය; මානව හිමිකම් ආරක්ෂකයිනට සම්පූර්ණ නිදහස සහ ආරක්ෂාව තිබේ යනාදී වශයෙන් පකිස්ථානය ප්‍රමුඛ රටවල් ගෙන ආ තර්ක, ලියැවිලි සහ සිදුවීම් පෙන්වීම මගින් බැහැර කිරීමට යෝජනාවට පක්ෂ රටවල් විශේෂයෙන්ම කැනඩාව සහ බ්‍රිතාන්‍ය සමත් විය.

මෙම සාකච්ජා ද්වයෙහි දී කැපී පෙනෙන ලකුණක් වූයේ යෝජනාවට පක්ෂපාතිත්වය දක්වන අතරම යථාර්තවාදී ලෙස ඊට සංසෝධන ගෙන ඒමට ලතින් ඇමෙරිකානු රටවල්, විශේෂයෙන්ම මෙක්සිකෝව, ආජන්ටිනාව, උරුගුවේ සහ චිලිය දැක්වූ ප්‍රවණතාවය යි. යෝජනාව වැඩි සාමාජික සංඛ්‍යාවකට පිළිගත හැකි එකක් බවට පෙරළීම එම ව්‍යයාමයේ අරමුණ යැයි පෙනෙන්ට තිබුණි.

ශ්‍රී ලංකාවේ යුද සමයේ සිදු වූ බවට චෝදනා කැරෙන දරුණූ ගනයේ මානව හිමිකම් කෙළෙසීම් සොයා බැලීම සඳහා පත් කළ යුතු බවට යෝජනා කැරෙන අන්තර් ජාතික යාන්ත්‍රණය පූර්ණ බලැති කොමිසමක් විය යුතු යැයි තදින්ම කියා සිටියේ කැනඩාව පමණි. ඉතා පැහැදිළිවම පෙනෙන්නට තිබුණේ බහුතර එකඟතාවයක් ඇත්තේ මානව හිමිකම් මහ කොමසාරිස් කාර්යාලය යටතේ ක්‍රියාවට නැගෙන අන්තර් ජාතික පරීක්ෂන යාන්ත්‍රණයකට බවයි.

මෙම සමුළුවාරය ඇරඹීමට පෙර ගෙවුනු සති කිහිපය පුරා ජිනීවා කරා පැමිණි ශ්‍රී ලාංකික මානව හිමිකම් ක්‍රියාධර පිරිස් තානාපති අංශ සමඟ කළ සාකච්ජාවන්හි දී පිළිතුරු නැති වැදගත් ප්‍රශ්ණ දෙකක් තිබූ බව කියනු ලැබේ. එනම් ශ්‍රී ලංකාව සම්බන්ධයෙන් දිගින් දිගටම යෝජනා ගෙන ඒමට ඇමෙරිකානු රජයට ඇති උවමනාව කුමක්ද සහ පසුගිය දෙවර්ශය තුළ සම්මත කරන ලද යෝජනා මගින් ශ්‍රී ලංකාවෙහි කවර හෝ සාධනීය වර්ධනයක් ඇතිව තිබෙන්නේ ද යනු ය.

මෙම ප්‍රශ්ණ දෙක ආමණ්ත්‍රනය කිරීමට මෙවර යෝජනාව උත්සාහ දරා ඇති බව ද මෙම නොනිල සාකච්ජාවන්හි දී දක්නට ලැබුනි. මෙවර යෝජනාව ගෙන එනු ලබන්නේ රටවල් පහක් හවුලේ ය. ඉන් දෙකක් එනම් මොන්ටෙනීග්‍රෝ සහ මැසඩොනියාව අග්නිදිග යුරෝපයෙනි. බ්‍රිතාන්‍ය බටහිර යුරෝපයෙනි. ඇමෙරිකා එක්සත් ජනපදය උතුරු ඇමෙරිකා මහාද්වීපයෙනි. මොරේෂස් අප්‍රිකානු මහාද්වීපයෙනි. එමෙන්ම මෙම එටවල් පහම නියෝජනය කරමින් ඉහළ පෙළේ රාජ්‍ය තාන්ත්‍රිකයින් නිල නොවන සාකච්ජාවන්හි මුළසුන හෙබවූහ. අඩු වැඩි වශයෙන් කරුණු ඉදිරිපත් කළහ.

මෙහිදී ඉදිරිපත් වූ කරුණූ කාරණාසැළකිල්ලට ගනිමින් සකස් කැරෙන යෝජනාවේ අවසන් කෙටුම්පත ලබන සතියේ දී එළි දැක්වෙනු ඇත.

දෙවැනිව මෙම යෝජනාව සිය විශය පථය පුළුල් කර තිබෙන්නේ ශ්‍රී ලංකාවේ දකුණූ දිගවාසීන්ට ද බලපාන මානව හිමිකම් ප්‍රශ්ණ ඊට ඇතුල් කර ගනිමිනි. වැලිවේරිය ඝාතන පවා යෝජනාවේ අංක 05 යටතේ සදහන් වෙයි. අංක 04 යටතේ සුළුතර ආගමික ස්ථානයන්ට කැරෙන පහරදීම්, මානව හිමිකම් ආරක්ෂකයිනට කැරෙන පහරදීම්, ජනමාධ්‍ය නිදහස ආරක්ෂා කිරීම යනාදිය සදහන් කරයි. එමෙන්ම උගත් පාඩම් කොමිසමේ එන වැදගත් යෝජනා, එනම් නීතියේ පාලනය පිහිටුවීම පිළිබඳ යෝජනා ද ඇතුළත්ව, ක්‍රියාවට නගන ලෙස ද යෝජනාවෙහි අංක 03 යට‍තේ කියා සිටී.

මෑතදී චන්ද්‍රිකා කුමාරතුංග විසින් ද කියා සිටි පරිදි මෙම යෝජනාව මානව හිමිකම් කවුන්සිලයේ සම්මත වන්නේ ශ්‍රී ලංකාවේ ප්‍රජාතන්ත්‍රවාදය වලපල්ලට ගොස් ඇති නිසා ය. එමෙන්ම එක්සත් ජාතික පක්ෂ විසින් ද කියා සිට ඇත්තේ මෙම යෝජනාව විදේශීය කුමන්ත්‍රණයක් නොව රාජපක්ෂ ඒකාධිපතිත්වය නිසා ඇතිවන විපාකයක් බවයි. විධායක ජනාධිපති ක්‍රමයට විරුද්ධ ව්‍යාපාරයේ ජනප්‍රිය නායකයකු වන මාදුළුවාවේ සෝභිත හිමි ද කියා සිටියේ අන්තර් ජාතික පරීක්ෂනයකට විරුද්ධ වීමට අවශ්‍යතාවයක් නැති බවයි. දකුණේ දේශපාලනය තුළ 2014 මාර්තු ජිනීවා යෝජනාව සම්බන්ධයෙන් ඇතිව තිබෙන මෙම සාධනීය පිළිගැනීම එම යෝජනාව සඳහා එතෙර සහ මෙතෙර කරන ලද මූලික සාකච්ජාවන්හි ප්‍රතිපලයකි.

යෝජනාව ඉදිරිපත් කරමින් අදහස් දැක්වූ ඇමෙරිකානු තනාපති නිලධාරිනී අවධාරණ උච්චාරනයක් යෙදවූ එක් කරුණක් වූයේ යුද්ධයේ දෙපාර්ශවයව ම විසින් කරන ලද අපරාධ ‍යෝජිත අන්තර් ජාතික පරීක්ෂන යාන්ත්‍රණය විසින් ගවේශණය කළ යුතු බව යි. යුද්ධය තුළ සිදු කරන ලද අපරාධ සම්බන්ධයෙන් තමන් පැත්තක් නොගන්නා බව පෙන්වීම මෙම යෝජනාවේ සම-අනුග්‍රාහකයින්ට අත්‍යවශය බව පෙනෙන්නට තිබුණි. එල්ටීටීඊ ය විසින් කරන ලදැයි චෝදනා කැරෙන යුද අපරාධ සම්බන්ධයෙන් ද සොයා බැලීමට පත් කැරෙන යාන්ත්‍රණයට බලය මෙන්ම වගකීමක් ද පැවරෙනු ඇත. සමහර විට, දැනටමත් ප්‍රකාශ වී ඇති පරිදි මෙම යෝජනාව මගින් ක්‍රියාවට නැගෙනු ඇති පරීක්ෂන යාන්ත්‍රණය විදේශගත දෙමළ ප්‍රජාවෙහි උන්නතිකාමී පිරිස් විසින් ප්‍රතික්ෂේප කිරීමට ද ඉඩ නැතුවා නොවේ.

එවිට රාජපක්ෂවරුන්ට අපූරු සගයකු ලැබෙනු ඇත!

දෛවයේ සරදමකට මෙන් ඉහත කී නොනිල සාකච්ජාවේ දෙවැනි දිනය වූ පසුගිය 10 වන සඳුදා ම යුරෝපයේ එල්ටීටීඊ හිතවාදී පිරිස් ජිනීවාහි මානව හිමිකම් කවුන්සිලය අභිමුව බිම් බෝම්බයකට හසුව පුපුරා ගිය කකුළක සංකේතය වන කකුල් තුනේ පුටුව සෙ‍වනෙහි උද්ඝෝෂණයක් පැවැත් වූහ. ඔවුන්ගේ ඉල්ලීම වූයේ එක්සත් ජාතීන්ගේ නිරීක්ෂනය යටතේ ශ්‍රී ලංකාවේ උතුරු නැගෙනහිර ජනමත විචාරණයක් පවත්වා ස්වාධීන ඊළාම් රාජ්‍යකට ඉඩ සැළසිය යුතු බවයි. ආවේගශීලී පිරිස් එසේ සටන් පාඨ කියමින් වාතලය දෙදරුම් කැවීමට දෙතුන් පැයකට පෙර යෝජනාවේ සම කැදවුම්කරුවන් උත්සාහ දරමින් සිටියේ අවම මට්ටමේ හෝ අන්තර් ජාතික පරීක්ෂනයකට මානව හිමිකම් කවුන්සිලයේ සහාය ලබා ගැනීමට ය‍. කොතරම් වෙනසක් ද?

එල්ටීටීඊ හිතවාදී විදේශ ගත දෙමළ පිරිස් හි අභිලාෂයන් සහ මානව හිමිකම් කවුන්සිලයේ එකඟතාවයන් අතර ඇත්තේ මහා පරතරයකි. දේශපාලන ජනප්‍රියත්වය පතා කැරෙන කතා සහ යතාර්ථය අතර ඇති වෙනස විටෙක අපූරුවට කැටිවෙයි. එවැනි අවස්ථාවක් වූයේ උතුරු පළාත් මංත්‍රිනී ආනන්දි සසිදරන් ජිනීවාහි දී කල මැදිහත්වීමකි. මෙම යෝජනාව මගින් අන්තර් ජාතික ප්‍රජාව දෙමළ ජනතාව රවටා ඇතැයි යාපනයේ දී ජනමාධ්‍යට ඇය කියා සිටියා ය. ( මානව හිමිකම් කොමසාරිස් නවි පිල්ලේ බොරු කාරියෙකැයි අමාත්‍ය සමරසිංහ කළ සඳහන මේ සමඟ සසදන්න.) නමුත් පසුගිය11දා ජිනීවාහි මානව හිමිකම් කවුන්සිලයේ සමාන්තර රුස්වීමක දී අදහස් දැක්වූ ඇය ඊට විරුද්ධව ව්‍යංගයෙන් යෝජනාව පිළිගනිමින් ඊට දේශපාලන විසඳුමක් ද ඇතුල් කරන ලෙස ඉල්ලා සිටියේ ය. සමහරවිට යළි යාපනයට ගිය පසු ඇය ඊටත් වඩා යෝජනාව හෙළා දැකීමට ඉඩ තිබේ.

ජිනීවා ගතිකත්වයන් විසින් පෙන්වා සිටින්නේ මෙම යෝජනාව සම්මතවීම විසින් සිංහල අන්තවාදී දේශපාලනය පමණක් නොව දෙමළ අන්තවාදී දේශපාලන ද අවුලකට යවන බව ය.

sd 120සුනන්ද දේශප්‍රිය | Sunanda Deshapriya


  • Nilupa

    ජිනීවා මානව හිමිකම් සමුළුව ශ්‍රී ලංකාවට එරෙහි සාවද්‍ය ප්‍රකාශ කරන්නන්ගේ මූලස්‌ථානය බවට පත් වී ඇත.

    මේ සතියේ දිනෙක ප්‍රභාකරන්ගේ සමීපතම ඥතියකුවන එම්. කේ. සිවාජිලිංගම්, ත්‍රිකුණාමල කොටි හමුදා නායක වූ එලිලන්ගේ බිරිය වූ ආනන්දි සසිතරන් ඇතුළු රාජ්‍ය නොවන සංවිධාන ක්‍රියාකාරීහු ජිනීවා මානව හිමිකම් සමුළුවේදි ශ්‍රී ලංකාවට එරෙහිව බොරු ප්‍රකාශ රැසක්‌ කරනු ලැබූහ.

    එලිලන්ගේ බිරිය ආනන්දි සසිතරන් මෙලෙස කියා සිටියේය.

    අපේ නිජබිම සිංහල හමුදාව මුළුමනින්ම අල්ලාගෙන අවසානයි. හැම උත්සවයකටම හමුදාව එනවා. කතාකරන්න ඉඩක්‌ නැහැ. ඔවුන් හැමදේම අල්ලාගෙන සිටිනවා. දේශපාලන සිරකරුවන් (කොටි) වසර ගණනක්‌ තිස්‌සේ රඳවා ගෙන සිටින අතර ඔවුන්ව නිදහස්‌ කර නැත. සැමදාම අපේ ද්‍රවිඩ කාන්තාවන්ට හා තරුණියන්ට හමුදාව විසින් ලිංගික වධ හිංසා කරනවා. ද්‍රවිඩ කාන්තාවන්ව උපත් පාලනයට යොදවනවා. සිංහල හමුදාවන්ට දරු උපත් වැඩිකරන ලෙස රජය උපදෙස්‌ දී තිබෙනවා.

    මේ රජය ඉතා ක්‍රමානුකූලව ද්‍රවිඩ රාජ්‍ය විනාශ කරනවා. අපේ සංස්‌කෘතිය දේශපාලනය හා ආර්ථිකයද වනසනවා. සිංහල ආණ්‌ඩු වසර 65 ක්‌ තිස්‌සේ ද්‍රවිඩයන්ට අසාධාරණ ක්‍රියා සිදු කළා. අන්තර්ජාතික ප්‍රජාව මැදිහත්වී අපට දේශපාලන විසඳුමක්‌ දිය යුතුයි.

    ද්‍රවිඩ රාජ්‍ය වැනසීමට ඔවුන් ද්‍රවිඩයන්ව සංහාරය කරනවා. යුද්ධය පැවැති සමයේ සිදුවු උල්ලංඝනය කිරීම් සහ ඉන්පසුව සිදුවූ උල්ලංඝනය කිරීම් ගැනද අන්තර්ජාතික විමර්ශනයක්‌ අවශ්‍යයි.

    ඝාතන රැසක්‌ සිදු කළ ප්‍රභාකරන්ගේ සමීපතම ඥතියකු වූ එම්. කේ. සිවාජිලිංගම් මෙලෙස කියා සිටියේය. ”දස දහස්‌ ගණනක්‌ ද්‍රවිඩයන්ට තමන්ගේ අහිමි වූ අය ගැන යුක්‌තියක්‌ අවශ්‍යයි. ද්‍රවිඩයන්ව කෲර ලෙස ක්‍රමානුකූලව ඝාතනය කළා. ශ්‍රී ලංකා රජයට ඔබලා වසර පහක්‌ කල් දුන්නා. නමුත් රජය කිසිදු ලෙසකින් ක්‍රියා කළේ නැහැ. උතුරු පළාත් සභාව ජාත්‍යන්තර විමර්ශනයක්‌ ඉල්ලා යෝජනාවක්‌ සම්මත කරගත්තා.”

    ඉම්ඩා සංවිධානයේ නායිකා නිමල්කා ප්‍රනාන්දු සමුළුව අමතමින් ජාත්‍යන්තර මැදිහත්වීමක්‌ දිගු කලක්‌ තිස්‌සේ ශ්‍රී ලංකාවේ ජනතාව බලාපොරොත්තුව සිටි බවත් අපට අන්තර්ජාතික විමර්ශනයක්‌ අවශ්‍ය යෑයි කියා ද සිටියාය.

    මේ රාජ්‍ය නොවන සංවිධාන නායිකාව පවසන අන්දමට තම රටේ හමුදාවට එරෙහිව ජාත්‍යන්තර විමර්ශනයක්‌ ඉල්ලා ඇත්තේ ජනතාවයි. මෙය මුළුමනින්ම සාවද්‍ය ප්‍රකාශනයක්‌ නොවේද?. මන්නාරමේ ජෙයපාලන් පියතුමාද උතුරු ප්‍රදේශය හමුදාකරණයට ලක්‌වී ඇතැයි කීවේය.

    අනතුරුව ශ්‍රී ලංකාවේ මානව හිමිකම් ක්‍රියාකාරිනියක්‌ යයි හඳුන්වාගත් ඈන් කැතරින්ද සමුළුව අමතමින් අවතැන්වූවන් 90000 ක්‌ ශ්‍රී ලංකාවේ සිටින බවට තවත් බොරුවක්‌ කීවාය.

    මේ පසුබිම මැද ශ්‍රී ලංකාවේ තවත් මානව හිමිකම් ක්‍රියාකාරිකයකු යයි පවසමින් නිරාන් ඇන්නටේල් නමැත්තකුද සමුළුව අමතනු ලැබීය. එහෙත් මානව හිමිකම් සමුළුව ඇමතූ අයගෙන් දෙදෙනකු මානව හිමිකම් උල්ලංඝනය කළවුන්ට සමීපතම අයයි.

    මානව හිමිකම් ගැන හඬ නගන ආනන්ති සසිතරන් ත්‍රිකුණාමල කොටි හමුදා නායක එලිලන්ගේ බිරියයි. ගොවීන්ගේ මානව හිමිකම් උල්ලංඝනය කරමින් මාවිල්අරාe සොරොව්ව වැසුවේ එලිලන්ය.

    ත්‍රිකුණාමලයේ මුස්‌ලිම් ග්‍රාමාරක්‍ෂකයන්ව පැහැරගෙන ගියේ ඔහුය. වන්නියේ පාතිමා දෙව්මැදුරේ ලැගුම්ගෙන සිටි ද්‍රවිඩ අනාථයන් රැසකට වෙඩි තබන ලෙස නියෝග කළේද එලිලන්ය.

    පසුගියදා උතුරු පළාතේ පැවැති පළාත් සභා මැතිවරණයේදී ද්‍රවිඩ මාධ්‍යවේදියකු ආනන්දි සසිදරන්ගෙන් ප්‍රශ්න කළේ සිවිල් වැසියන් පැන යැමට උත්සාහ කරද්දී වෙඩි තැබීම ගැනයි.

    පිරිසක්‌ දුක්‌ විඳින විට තවත් පිරිසකට පැන යන්න දිය හැකිදැයි ඇය කියා සිටියාය. එසේ නම් දැන් ජිනීවා ගොස්‌ මානව හිමිකම් ගැන හඬනගන්නේ මානව හිමිකම් උල්ලංඝනය කළ පිරිස්‌ නොවේද?

    මේ රාජ්‍ය නොවන සංවිධාන ක්‍රියාකාරීහු අතරින් නිමල්කා ප්‍රනාන්දුට අවශ්‍ය වී ඇත්තේ උතුරට ස්‌වයංපාලනය දීමයි. ස්‌වයංපාලනයට ඇති හිමිකම අහිමි කර තිබෙනවා යෑයි ඇය මානව හිමිකම් සමුළුවේදී කියා සිටියාය.

    ඉන් ඇය කියන්නේ ශ්‍රී ලංකාව දෙකඩ කර ඊළාම් රාජ්‍යය නොදීමත් මානව හිමිකම් උල්ලංඝනය කිරීමක්‌a ලෙසයි. එසේ නම් ඉන්දියාවේ බිහාරයේ මාඕවාදීන්ට හා ඇසෑමයේ බෙදුම්වාදීන්ටත් ස්‌වයංපාලනය නොදීම ඉන්දීය රජය මානව හිමිකම් උල්ලංඝනය කිරීමක්‌ නොවන්නේද?

    මානව හිමිකම් උල්ලංඝනය කිරීම් යෑයි කියමින් මානව හිමිකම් සමුළුව හමුවට යන රාජ්‍ය නොවන සංවිධාන ක්‍රියාකාරීහු උත්සාහ කරන්නේ ශ්‍රී ලංකාවේ කොටි හිතවාදීන්ට හා කොටි ඩයස්‌පෝරාවේ ඉල්ලීම් ඉටු කරලීමට සහාය වීම නොවේද?

    මේ අන්දමට ඊශ්‍රායලය යුද අපරාධ කළ බව කියමින් බ්‍රිතාන්‍ය අධිකරණ හිටපු විදේශ ඇමැතිනිS මිසි ලිවිනිට එරෙහිව චෝදනා නඟද්දී සමස්‌ත ඊශ්‍රායල් ජනතාවම ඊට විරුද්ධ විය.

    ආණ්‌ඩු පක්‍ෂය මෙන්ම විරුද්ධ පක්‍ෂය ද එක්‌වී දැක්‌වූ විරෝධතා නිසා බ්‍රිතාන්‍ය රජයට සිදු වූයේ අධිකරණ නියෝගය ඉවත් කර ගැනීමටයි.

    එහිදී ඊශ්‍රායල් අගමැති බෙන්ජමින් නෙතන්යාහුq පැවසුවේ බ්‍රිතාන්‍ය බලධාරීන්ද යුද අපරාධ සිදු කර ඇති නිසා ඊශ්‍රායලය නඩු අසා චෝදනා ගොනු කරන බවයි.

    මේ තත්ත්වය මත කොටුවේ මහ බැංකු බෝම්බය නිසා 100 කට අධික සිවිල් වැසියන් මිය යැම ගැන ප්‍රභාකරන් ට එරෙහිව යුද අපරාධ චෝදනා එල්ල නොවූයේ මන්ද”.

    නවි පිල්ලේගේ විමර්ශන වාර්තාවෙන් කොටි සංවිධානය සිදු කළ යුද අපරාධ ගැන ද සෙවිය යුතු යෑයි ප්‍රකාශ කර ඇතත් ඇමරිකාව පසුගිය මාර්තු 3 දා ඉදිරිපත් කළ ශ්‍රී ලංකාවට එරෙහි යෝජනාවේ කිසි තැනක කොටි අපරාධ ගැන සෙවිය යුතු යෑයි දක්‌වා නැත.

    ඊට මූලික හේතුව නම් යුද අපරාධකරුවන් වූ රුද්රකුමාර ඇමරිකාවේද ඇඩෙලා බාලසිංහම් බ්‍රිතාන්‍යයේද සිටීමයි.

    මෙරට හිටපු ඇමරිකානු තානාපති රොබට්‌ බ්ලේක්‌ වරක්‌ පැවසුවේ රුද්රකුමාර්ට එරෙහිව කිසිදු නීතිමය පියවරක්‌ ගැනීමට තමා ඉඩ දෙන්නේ නැති බවයි.

    එසේම ඇඩෙලා බාලසිංහම් හා කොටින්ට අවි ආයුධ මිලයට ගැනීමට අරමුදල් සැපයූ ටී. ආර්. ඕ. සංවිධානයේ රෙජී ද ලන්ඩනයේ සිටී.

    මොවුන්ට එරෙහිව අගමැති ඩේවිඩ් කැමරන්ගේ රජය අද දක්‌වාම කිසිදු පියවරක්‌ ගෙන නැත.

    එහිදී ඇමරිකාව හා බ්‍රිතාන්‍යය පවසන වගකීම දැරීමේ ක්‍රමවේදය එකී යුද අපරාධකරුවන්ට බලපා නැත.

    මේ තත්ත්වය මැද මානව හිමිකම් කොමසාරිස්‌ නවි පිල්ලේට ශ්‍රී ලංකාව සම්බන්ධව ගත හැකි ක්‍රියාමාර්ගය කුමක්‌ද? ඒ විශේෂ විමර්ශකයකු පත් කිරීම, විනිශ්චය කොමිසමක්‌ පත් කිරීම හා ශ්‍රී ලංකාව ගැන සෙවීමට විද්වත් මණ්‌ඩලයක්‌ පත් කිරීමයි.

    ඒත් ඇමරිකානු රජය උත්සාහ කරන්නේ විනිශ්චය කොමිසමක්‌ පත් කිරීමටයි. ඒ අනුව එකී කොමිසම ශ්‍රී ලංකාවට පැමිණ විමර්ශන කටයුතු ආරම්භ කිරීමට රජයේ අවසරය පතනු ඇත. ඊට අවසරය දුන්නොත් එය ඉල්ලාගෙන කෑමක්‌ වනු නියතය. මන්දයත් උතුරේ බොරු සාක්‍ෂිකරුවන් එකී කොමිසම හමුවේ බොරු සාක්‍ෂි දීමට සූදානම් වීමයි.

    ශ්‍රී ලංකාවට එරෙහිව එක්‌සත් ජාතීන්ගේ දරුස්‌මාන් මණ්‌ඩලයට පෙත්සම් 4000 ක්‌ හා සාක්‍ෂිකරුවන් 2000 ක්‌ ඉදිරිපත් වී ශ්‍රී ලංකාවට එරෙහිව සාවද්‍ය සාක්‍ෂි ලබාදී තිබේ.

    එම තත්ත්වය මත නවි පිල්ලේ පත් කිරීමට නියමිත විනිශ්චය මණ්‌ඩලයටද තොගපිටින් බොරු සාක්‍ෂිකරුවන්a ඉදිරිපත් වනු නියතය.

    එකී සාවද්‍ය සාක්‍ෂි විනිශ්චය කොමිසම පිළිගනු ඇත.

    මෙය නඩුත් හාමුදුරුවන්ගේ බඩුත් හාමුදුරුවන්ගේa යන ක්‍රියාදාමයයි.

    ශ්‍රී ලංකාවට එරෙහිව ඇමරිකානු යෝජනාව ඉදිරිපත් කිරීමට නියමිතව ඇත්තේ මාර්තු 26 දායි. එහෙත් නවි පිල්ලේ සහ ඇමරිකාව දැනටමත් තීන්දුව ප්‍රකාශ කර අවසානය.

  • Ranga

    ජෙනීවා කෝලමෙන් ලැබෙන ආරංචි අනුව ව්‍යාජ ජාත්‍යන්තර පරීක්‌ෂණය වෙනුවට අභ්‍යන්තර පරීක්‌ෂණයක්‌ පැවැත්වීමට ආණ්‌ඩුවට බලකිරීමේ යෝජනාවක්‌ සම්මත කරගැනීමේ ඉඩකඩක්‌ වෙයි. එය ද මානුෂීය මෙහෙයුම්වල අවසාන සති දෙකට සීමා කිරීමට බටහිර බලවතුන්ට අවශ්‍ය වී ඇත. ආණ්‌ඩුව මේ කිසිම පරීක්‌ෂණයකට එකඟ විය යුතු නො වේ. අප නිතර කියා ඇති පරිදි මෙහි ඊනියා මානව අයිතිවාසිකම් කඩවීමේ ප්‍රශ්නයක්‌ නැත. මානව අයිතිවාසිකම් කඩවීමේ කතාව පටන් ගත්තේ මෙහෙයුම්වලින් ටික කලකට පසු එහෙත් 2010 ජනාධිපතිවරණයට පළමු ඇමරිකාවට ගොස්‌ පැමිණි සරත් ෙµdන්සේකා ය. ඔහුට විරුද්ධව ඇමරිකාවේ ප්‍රාන්ත අධිකරණයක තිබූ නඩුව ඉන්පසු ඉවත්කරගනු ලැබිණි. ඔහු අත්අඩංගුවට ගත යුතු යෑයි අප කියා සිටියේ ජනාධිපතිවරණ වේදිකාවල ය. ප්‍රශ්නය මානව අයිතිවාසිකම් කඩවීමක්‌ නොව දෙමළ ජාතිවාදයට දොළ පිදේනි දෙවීමට එංගලන්තය ප්‍රමුඛ බටහිර රටවලට නො හැකිවීම ය. අද එහි පළිය ජනාධිපතිතුමාගෙන්, ආරක්‌ෂක ලේකම්තුමාගෙන් හමුදාවෙන් හා පොදුවේ සිංහල ජාතියෙන් ගැනීමට බටහිරයෝ වලිකති. බටහිරයන්ට නීතිය හා ව්‍යවස්‌ථාව ඉගෙනගත් ජෙනිංග්ස්‌ගේ දරුවන්ගේ සහාය ද ලැබෙයි.

    මෙරට දෙමළ ප්‍රශ්නය ඇතිකළෝ දුම්කොළ වගාවට දෙමළ වෙල්ලාලයන් මෙරටට ගෙන ආ ලන්දේසිහු ය. ඉංගිරිසිහු ව්‍යවස්‌ථාදායක මණ්‌ඩලයට සිංහල ජාතිය හා දෙමළ ජනවර්ගය නියෝජනය කිරීමට ඉතිහාසය, සංස්‌කෘතිය පමණක්‌ නොව ජනගහන අනුපාතය ද නොසලකා එක්‌ අයකු බැගින් පත්කිරීමෙන් සිංහලයන් ව්‍යවස්‌ථාපිතව සුළුතරය බවට පත්කිරීමේ ක්‍රියාදාමය අරඹා දෙමළ ජාතිවාදයට උඩගෙඩි දුන්හ. ඉංගිරිසින්ගේ කාලයේ සිට බැලුවත් දෙමළ ප්‍රශ්නයට, එනම් ව්‍යවස්‌ථාපිතව සිංහලයන් සුළුතරය බවට පත්කිරීමේ ක්‍රියාදාමයට වසර දෙසියයක්‌ පමණ වෙයි. රාමනාදන්ලා, අරුණාචලම්ලා, පොන්නම්බලම්ලා, ඉංගිරිසි ආණ්‌ඩුකාරවරු ප්‍රශ්නයේ මුල සිට ක්‍රියාත්මක වූහ. චෙල්වනායගම් ඒ ක්‍රියාදාමයේ සංධිස්‌ථානයක විය. ජෙනිංග්ස්‌ගේ දරුවන්ගේ මතකයේ ඇත්තේ ප්‍රභාකරන් වුවත් සිංහලයන්ට හිමිතැන නොදීමට පැන වූ 29 වැනි වගන්තිය ව්‍යවස්‌ථාවට ඇතුල් කළ ජෙනිංග්ස්‌ ද අපේ මතකයේ වෙයි. (පසුගිය දිනවල ජෙනිංග්ස්‌ගේ මිණිබිරියක ලංකාවට පැමිණීම නිසා ජෙනිංග්ස්‌ගේ දරුවෝ කුල්මත් වී සිටිති). ප්‍රභාකරන් යනු ඉහත සඳහන් සියලු දෙනාගේ ඥාතියෙකි. (වැඩි විස්‌තර සඳහා ප්‍රභාකරන් ඔහුගේ සීයලා බාප්පලා හා මස්‌සිනාලා කෘතිය කියවන්න). මානුෂීය මෙහෙයුම් යනු අහම්බෙන් ඇතිවූවක්‌ නො වේ. එහි මුල ඇත්තේ ඉංගිරිසි ආණ්‌ඩුකාරයන් හා දෙමළ ජාතිවාදී නායකයන් ය. ප්‍රභාකරන් ආයුධ ගත්තේ ප්‍රශ්නය ඇති වී අවුරුදු එකසිය පනහකටත් වඩා ගත වීමෙන් පසුව ය. ප්‍රභාකරන් පැරදවීමට මෙරට සිටි බෙලහීන ජනාධිපතිවරුන්ට හා ජනාධිපතිවරියට නොහැකි විය.

    මානුෂීය මෙහෙයුම් නොවන්නට තවමත් ප්‍රභාකරන් අහිංසක මිනිසුන් ගැහැණුන් හා දරුවන් මරාදමනු ඇත. අවසාන සති දෙකෙහි බටහිරයන්ට ප්‍රභාකරන් බේරාගෙන යුරෝපයට ගෙන යැමේ අවශ්‍යතාව විය. ජනාධිපති මහින්ද රාජපක්‌ෂ මහතා එයට ඉඩ නො දුන්නේ ය. ප්‍රශ්නය ඊනියා මානව අයිතිවාසිකම් කඩවීමක්‌ නොව දෙමළ ජාතිවාදය බැවින් අභ්‍යන්තර පරීක්‌ෂණයක්‌ වුව ද අවසාන සති දෙකට සීමා නොවිය යුතු ය. නිවැරදි ව කරන්නේ නම් අඩුම තරමෙන් දහනවවැනි සියවසේ දෙවැනි දශකයේ සිට පරීක්‌ෂණය පැවැත්විය යුතු ය. එහෙත් එය කිසි ම ලෙසකින්වත් අවසාන සති දෙකට සීමා නොවිය යුතු ය. ප්‍රශ්නයේ ප්‍රභාකරන් අවධිය පිළිබඳවවත් කරන පරීක්‌ෂණයකට ආණ්‌ඩුව එකඟ විය යුතු නො වේ. අවසාන සති දෙක යනු ඉතිහාසයේ ක්‍රියාවලියක එක්‌ සීමිත කාලයක්‌ පමණකි. ප්‍රභාකරන් පැරදවීමට නොහැකි වූ ජනාධිපතිවරු ද පරීක්‌ෂණයෙහි වගඋත්තරකරුවෝ වෙති. එතරම් තරුණයකු නොවූ සජිත් ප්‍රේමදාසට තම පියා කොටින්ට ආයුධ සැපයූ බව හා පොලිස්‌ භටයන් හත්සියයක්‌ පමණ ප්‍රභාකරන්ට පාවාදුන් බව මතක ඇතැයි සිතමු. රනිල් වික්‍රමසිංහ ජනාධිපතිව නොවී සිටියදීත් ව්‍යවස්‌ථාවට පටහැණිව ඊනියා සටන් විරාම ගිවිසුමක්‌ ඇති කිරීමෙන් ප්‍රභාකරන්ට නව පණක්‌ ලබාදුන්නේ ය. මේ සියල්ලෝම පරීක්‌ෂණයක්‌ පැවැත්වෙන්නේ නම් එහි වගඋත්තරකරුවෝ බවට පත්වෙති. එපමණක්‌ නොව බටහිර රටවල පාලකයෝ ද වගඋත්තකරුවෝ වෙති. අද ද කොටි සංවිධානය ඇතැම් බටහිර රටවල නාමිකව තහනම් කෙරුණ ද එහි පෙරමුණු සංවිධාන ක්‍රියාත්මක වෙයි. බටහිරයෝ අද සිංහලයන්ට විරුද්ධ ව විසුරුණු දෙමළ ජනයා යොදා ගනිති. පසුගිය දා කොටි සංවිධානයේ ධජය රැගත් උද්ඝෝෂණයකට කැනඩාවේ ඉඩ ලැබිණි. අපට පරීක්‌ෂණයක්‌ පැවැත්වෙන්නේ නම් මේ සියල්ලන් ම වගඋත්තරකරුවන් කිරීමට අවශ්‍ය වෙයි. මෙයින් කියෑවෙන්නේ අභ්‍යන්තර වුවත් පරීක්‌ෂණයක්‌ පැවැත්වීමට ආණ්‌ඩුව එකඟ විය යුතු බව නො වේ. ඉහත සඳහන් වගඋත්තරකරුවන් නොමැති ව කෙසේවත් පරීක්‌ෂණයක්‌ නොපැවැත්විය යුතු බව ය. ඒ අතර තවත් වගඋත්තරකරුවෝ වෙති. අද ද කොටි සංවිධානයේ මිනිමැරුම්වලට වගකිවයුත්තෝ බටහිර රටවල ජීවත් වෙති. පරීක්‌ෂණයක්‌ ගැන කතාකිරීමටත් පළමුව බටහිර රටවල් ඔවුන් ලංකාවට භාරදිය යුතු ය. ඒ පරීක්‌ෂණයකට පූර්ව අවශ්‍යතාවක්‌ ලෙස නො වේ. ඒ අපරාධකරුවන් බටහිර රටවල රඳවා තබාගැනීමෙන් කැමරන්ද ඇතුළු බටහිර පාලකයෝ කොටින්ගේ මිනීමැරුම්වලට වගකිවයුත්තෝ වෙති. විශේෂයෙන් ම තවමත් එංගලන්තයේ වෙසෙන ඇඩෙල් බාලසිංහම් ලංකාවට භාරදීම කැමරන්ගේ යුතුකමක්‌ වෙයි. ඔහු ඇයට එංගලන්තයේ රැකවරණ ලබාදීමෙන් ඔහුගේ මානව අයිතිවාසිකම් කතාව පුස්‌සක්‌ බවට පත්වෙයි. ළමා සොල්දාදුවන් ගැන කිඹුල් කඳුළු හෙළුE බටහිරයන් ඒ සම්බන්ධයෙන් වගකිවයුතු එක්‌ ප්‍රධාන පුද්ගලයකු වූ ඇඩෙල් බාලසිංහම්ට රැකවරණ ලබාදෙන්නේ කෙසේ ද? සයනයිඩ් මාල දෙමළ තරුණියන්ගේ ගෙළවට පැළ» ඇඩෙල් මානව අයිතිවාසිකම්වලට ගරු කළේ ද? කැමරන් ඊනියා ජාත්‍යන්තර හෝ අභ්‍යන්තර හෝ පරීක්‌ෂණ ගැන කතාකිරීමට පළමු යුද්ධාපරාධකාරියක වූ ඇඩෙල් බාලසිංහම් ලංකාවට භාරදිය යුතු ය. එසේ කරන තෙක්‌ අභ්‍යන්තර පරීක්‌ෂණයක්‌ ගැනවත් කතාකිරීමට ලංකාණ්‌ඩුව බැඳී නැත.