උතුරේ‬ ජනයාට විමුක්තිකාමියා දකුණට ත්‍රස්තවාදීයෙකු වූ, දකුණේ විමුක්තිකාමියා උතුරට ත්‍රස්තවාදීයෙකු වූ අදුරු කාලයක සිට අප වර්තමාන ලෝකයට පා නගා ඇත. එහෙත් මොහොතකට සිතුවොත් වර්තමානයේද ඇතැම් තැන් අතීත කලු පැල්ලම් මතින් බිහිව ඇති වග ඔබට වැටහෙනු ඇත.

තිලීපන් යන නාමය මතක් වූ විගස බොහෝ අයට මතකයට එන්නේ එල්ටීටීඊ සංවිධානයයි. මතු පිටින් අත ගා කොස් පොලොස් තොරනා සමාජ මානසිකත්වය තුල එය සාධාරණය. එල්ටීටීඊ සංවිධානය ආයුධ ගැනීම සහ එය නැගී සිටීම 1988 වර්ෂය වෙනතාක්ම සාධාරණය. එහෙත් සියයට සියයක්ම නොවෙනා වග මතකයට ගත යුතුය. එසේම එල්ටීටීඊ වැනි විශාල සංවිධානයක් තනි ප්‍රභාකරන් කෙනෙකුට බිහිකිරීමටද නොහැකිය.

එකල සිංහල සහ දෙමළ අමණ පාලකයන්ගේ දේශපාලන තුරුම්පු වලට හසුව ජාතිවාදය කරපින්නා ගත් මිනිසුන් එකම රටේ දෙපැත්තට බෙදින. එම බෙදීම 2009 මැයි 18 න් අවසන් වූවා යැයි අයෙකු කියයි නම් එය නියතයෙන්ම මුලාවකි. මෙම ඉතිහාසය තුල එල්ටීටීඊ ය හෝ දෙමළ ජනයා සහමුලින්ම සාධාරණය වී සිංහලයා අසාධාරණ වනවාද? නැත.. ශ්‍රී ලංකාවේ ජනවාර්ගික අර්බුදය පටන් ගත් දින සිටම පැහැදිලි මනසකින් එය පරීක්ෂණයකට භාජනය කලහොත් සිංහල සහ දෙමළ ජාතිවාදීන්ගේ මූලිකත්වයෙන් රෝපනය කලා වූ විනාශකාරී පැලය සන්නද්ධ අරගලයයි.

එල්ටීටීඊ සංවිධානය යනු වෙනත් රටකින් පැමිණි මිනිසුන්ගෙන් නොව අපේම රටේ තවත් එක් ජනකොටසකින් සැදුම් ලද සංවිධානයකි. එය බොහෝ දෙනා සිතන පරිදි පණු අමාරුවට අවි ගත් සංවිධානයක් නොවේ. ඉතා දිගු පැටලැවිල්ලක අවසානයකි. මිනිසුන් තම ගැටලුවලට දේශපාලනිකව විසදුම් නොවූ තැන සන්නද්ධ විසදුම් සොයති. එදා උතුරේ දේශපාලකයන් දෙමළාගේ ඡන්දය හිගා කා දකුණේ සැප පුටුවල විස්කි බිව්වෝය. ඒ අතරම දෙමළ ජනයාගේ හිසට ජාතිවාදය එන්නත් කළේ නුඹලාට වෙනම දේශයක් අවශ්‍යයි කියමිනි. සිංහල පාලකයාද එයට නොදෙවෙනි විය.

අවසානයේ දේශපාලනිකව විසදුම් නොවූ තැන සන්නද්ධ අවි නැගෙනහිරින් එස වුනේය. ඒ අතරම එම අරගලය සන්නද්ධවම විසදිය නොහැකි වග තේරුම් ගත් මිනිසුන් සිටියේය. තමිලනී ජෙයකුමාරන්ට එය වැටහුනේ එල්ටීටීඊය යුද්ධය අතින් පරාජය වූවාට පසුය.

Thileepan_fp

එහෙත් අප අද කතාකරන තිලීපන් එය වටහා ගත්තේ එල්ටීටීඊයේ මුල් අවදියේදීය. තිලීපන් ගැන සටහනකට මග පෑදුවේද මෙම අසහාය මිනිසාගේ ක්‍රියාකලාපය නිසාම වග මතක් කල යුතුමය.

තිලීපන් යාපනය වඩුක්කොඩෙයි හි උපත ලබන්නේ 1963 නොවැම්බර් 29 වනදාය. ඔහු වියලි කලාපීය ගොවි පවුලක එකම සමාජිකයාය. කුඩා කල සිටම අධ්‍යාපනයට මහගු දස්කම් පෑ තිලීපන් වඩුක්කොඩෙයි දෙමළ පාසලෙන් අධ්‍යාපනය ලබා, යාපනය විශ්ව විද්‍යාලයට තේරී පත් විණි. 80 දශකය වනවිට තිලීපන් තරුණයෙකි. එකල ඉහත කී පාලකයන්ගේ නරුම පොරොන්දු වලට රැවටී මිරිකී සිටි උතුරේ දෙමළ ජනතාව කෙරේ තිලීපන් දැක්වූ සානුකම්පිත භාවය ඔහු ගේ අරගලය තුල මැනවින් ඔප් නැංවිණි. අධ්‍යාපන ප්‍රමිතිකරණ පනතට එක හෙලා විරුද්ධ වූ ඔහු විශ්ව විද්‍යාලයීය ශිෂ්‍ය සංගමයෙන් එළියට ඔහුගේ හඩ අවදි කලේය. ‘ජනතාවනි පාලකයන්ගේ අවියට බිය නොවන්න අයිතිය වෙනුවෙන් පෙරට එන්න..‘ එදා බැරලයක් උඩ සිට කෑ ගැසූ මෙම තරුණයා දිනෙක මුලු මහත් හදවත් තුල සදාකාලික ජීවනාලියක් වන බව කවරෙකු වත් නොසිතන්නට ඇත.

පසු කලෙක රජය මගින් ඉන්දු ලංකා ගිවිසුම අත්සන් කොට අසල් වැලි ඉන්දියානු අධිරාජ්‍යවාදයේ කොලණියක් බවට ලංකාදීපය පත් කරන විට සිංහල, දෙමළ, මුස්ලිම් දෑ හිතකාමීන් එයට විරුද්ධ විය. ඒ සදහා ජාති, වර්ග බෙදීමක් නොවීය. ඒවන විට තිලීපන් යනු උතුරේ අරගලයේ දිදුලන නාමයක් විය.“අපට සිංහල මිනිහා එක්ක ගැටලුවක් නෑ. අපට වෙඩි තියන සිංහල හමුදාව එක්කත් ගැටලුවක් නෑ..අපට ගැටලුව තියෙන්නේ දේශපාලකයා එක්ක…” ඔහුගේ මතය ඉතා වේගයෙන් උතුරු කරයේ පැතිර ගියේය. දහස් ගණන් ශිෂ්‍යන් ඔහුගේ මාවතේ ඇදෙන්නට විය. කෙටියෙන්ම තිලීපන් යන නාමය දෙමළ හදවත් පැහැරගත්තේය. 83 කලු ජූලිය මොහොතේ ප්‍රභාකරන්ට විශේෂ නියෝගයක් සහ නිවේදනයක් ලබා දෙන්නේය. දකුණට දෙමළා නැතිනම් උතුරටද සිංහලයා නැතිය. එහෙත් තිලීපන් කුඩා තරුණ වියේදිම ලිපියකින් ප්‍රභාකරන් ඇමතුවේය. දකුණ ද උතුර ද ගිනි ගත්තේ නම් අපද එය අතර සිරවූ මිනිසුන් පමණි. මෙකී ලිපිය තිලීපන් හමුවීමට යාමට තරම් ප්‍රභාකරන්ට විශේශ විය. ඉන්දු ලංකා ගිවිසුම එපා යැයි උතුරේ සහ දකුණින් මහා හඩ නැගෙද් දී පාලකයන් එම ජනතා විරෝධය කසල බදුනකට දමමින් ගිවිසුම අත්සන් කලේය.

1987 එවකට ජනාධිපති ජේ. ආර් ජයවර්ධන සහ ඉංදියානු අගමැති රජිව් ගාන්ධි අතර ඇති වූ මෙම ගිවිසුම මගින් පැය හතලිස් දෙකක් ඇතුලත ලංකා ආරක්ෂක අංශ උතුරින් ඉවත් වූ අතර ඉන්දියානු ආරක්ෂක අංශ උතුර වෙලා ගත් හ. අසරණ පීඩිත දෙමළ කාන්තාවන් අමු අමුවේ දූෂණය කොට දමමින් ඔවුන් උතුරේ දෙමළ ජනයාට වෙනම රාජ්‍යක සිහිනය වක්‍රාකාරයෙන් ලබා දෙමින් සිටියේය. අපෙන් නිදහස් වෙන්නම් උඹලා සිංහල හමුදාව පරාජය කරපල්ලා. යන්න දෙමළ සිත් තුල කිදාබස්සවමින් කල අමන ක්‍රියාපටිපාටිය එකල එල්ටීටීඊය සහ දෙමළ ජනයාව නොමග යවන්නට නොහැකි විය.

ඒ අනුව ඉංදියානු හමුදාවට එරෙහිව දෙමළ විමුක්තිකාමීන්ගේ සටනක් දියත් කරන්නට පටන් ගත් හ. එහෙත් තම මතයෙන් පිට නොගිය තිලීපන් 1987 සැප්තැම්බර් 15 වනදා යාපනය නල්ලුර් කන්දසාමි කෝවිල අසල මාරාන්තික උපවාසයක් ආරම්භ කලේය.

ජල පොදක් වත් නොමැතිව ඔහු ආරම්භ කල උපවාසය නැවැත්වීමට නම් වහාම ඉංදු ලංකා ගිවිසුම හකුලා ගත යුතු බව ඔහු රජයට බල කලේය. එහෙත් නිසි දේශපාලන විසදුමක් නොවූ මරි මෝඩ රජයට ඉංදියාවේ දෙපා අසල දණනැවීමට මිස එය හකුලා ගැනීමට තරම් කොන්දක් නොවීය.

1987 සැප්තැම්බර් 20 වනදා තිලීපන් අවසාන වතාවට ජාතිය අමතන්නේය.

“සහෝදරවරුනි තවත් ටික දිනකින් මා මියෙනු ඇත..එහෙත් නුඹලාගේ අයිතිය වෙනුවෙන් සටන් කරන දහස් ගණනක විමුක්ති කාමීන්ගේ උපත මාගේ මරණය සමගම සිදුවනු ඇත….”

1987 සැප්තැම්බර් 26 වනදා පුරා දින 12ක් ආහාර සහ ජලය නොමැතිව සිටීම හේතුවෙන් ඒ අපූරු විමුක්තිකාමියා, ගාන්ධිවරයා සදහටම නෙත් පියාගන්නේ මුලුමහත් පීඩිත ජනතාවගේම දෑස් කදුලින් තෙත් කරමිනි. ඉන්පසු එල්ටීටීඊය ට අවිහිංසාවාදී ගමනක පාවඩ එලන්නට කිසිවෙකු නොසිටියේය.

ස්මාරකය බිඳදමා අති අයුරු
ස්මාරකය බිඳදමා අති අයුරු

2010 වන වසරේ යාපනයේ තිලීපන් ස්මාරකය ගලවා ඉවත් කරන්නෙය.(යාපනයේ තිලීපන් ස්මාරකය උදුරා දමයි..) එය පිහිටා තිබුනේ වසර විස්සකට ලගා වන තුරුම රජයේ පාලන ප්‍රදේශයේය. එය ගලවා ඉවත් කිරීම තුලින් ස්මාරකයක් ඉවත් වුව ද ජනතාවගේ සිත්තුලින් තිලීපන් ඉවත් වී නොමැති බවට බොහෝ සාධක ඇත. අනෙක් කරුණ නම් පිළිමයක් ඉවත් කොට ජනතාවගේ සිත් අතරින් වීරයන් අමතක කිරීමට ගත් මරි මෝඩ ආකල්පය ලැජ්ජා සහගතය. මෙය අනෙක් එල්ටීටීඊ පිළිම හා සැසදෙන්නේ නැති බවද මතක් කල යුතුය. ඒ තිලීපන් මිලේච්ඡත්වය ට එරෙහිවූ නිසාය.

තිලීපන් යනු සිංහල දෙමළ වෙන් කිරීමකින් තොරව පරමාදර්ශයට ගත යුතු විමුක්ති කාමියෙක් ය. ඔහු අද දවසේ අසාධාරණයට, පීඩනයට, මර්දනයට එරෙහිව සටන් වදින ලාංකීය අරගලකරුවන්ට මහා පාඩම් රාශියක් ඉතිරි කොට තබා නික්ම ගොස් ඇත.

එබැවින් තිලීපන් ජීවමානය..!

yohanචරිත් ජනප්‍රිය යොහාන්