Image Credit: sesatha
තුනට පැලුණු ඉල්මහ විරු
ඉල්මහ විරුවෙකු
තුනට පැලී
අහිමි මිහිකතෙන් නැගිට සිටී
|
රතු මල් අතුරන
මන්තර මතුරන
පර වූ ආතුර
කට්ටඬි පිදේනි බලා සිටී
|
“අපි උඩ දමනා
ඇදුරනි නුඹලා
අඳ පරඬැල් “
|
දකුණට
එරෙහි ව දකුණයි
උඹලට
අප නම් විරුවොයි
දකුණට
එරෙහිව උතුරයි
උඹලට
උන් නම් සතුරොයි
|
කණට කර අසයි
මිටියෙන් හදට තඩි බා
ගොරවා හඬන ඉල් මහ
දේශ ප්‍රේමයේ දිග සහ පළල
දෑ කැත්ත ගිලිහුණ
|
ඇත
තුනට පැලුණු විරුවෙක්
එතැන් සිට
වූහ හේ හතුරෙක්
|
කප්පරක් තිබුණාට අඩුපාඩු
ගැබ්බරව මියගියත් නෙකවාර
ආත්මය පිරිසිදුයි හැමවාර
විරුසමරු අනවැසිය මතුවාර
|
නිගරුවක් නොදී
වැළලෙන්න හැකිනම්
අගරු වූ මරණයත්
අර්ථයක් ගෙනේ නම්
|
න්‍යෂ්ටියක් ආත්මෙන්
තුනට පැලුණේ නම්
අහිමි වූ මිහිකතක
රතු මලක් පිපේ නම්
|
ඉල්මහේ වහින්නට එකට මතුවට
මගහැරුණු වැසි දෙකක් දෙතැනක
උතුර දකුණ ද
දකුණ උතුර ද
වෙන් කර හැඳින
එක්කොට හිතන දවසක
|
න්‍යෂ්ටිය තුනට පැලුණා
යෂ්ටිය ගිලිහි හැලුණා
දෘෂ්ටිය එබී බලනා
මුෂ්ටිය ධජය සැලෙනා
උදය ආර්. තෙන්නකෝන්
