Image Credit: srilankaclick.com
අයිතිය නිදහස ජීවිත යාප්පුවෙන් පැහැර ගත්ත
සේප්පු පුරවන ඈයොත් මේ දවසෙත් අරක් ගත්ත
හරක් කියා පාලකයොත් ගැති හඬ මැද අසුන් ගත්ත
බලපල්ලා රවටන හැටි ටීවි එකට රූප ගත්ත
|
ශ්‍රම දහඩිය රට සම්පත හරි හරියට කොල්ල කමින්
විලි සංගේ නැති විදිහට මේ දිනයත් කෙළෙසවමින්
කම්කරුවත් පීඩිතයක් ගොන් රැළකට අන්දවමින්
මුසාවාද බණ අතරේ අර්ත නොමැති බණ දෙසමින්
|
රතු කොඩියෙන් ජාතක වුණු හිටපු වමට කෑ මොර දුන්
වලිගය යට ඉන්නා සැටි එම මහතුන් බලා ගනින්
පැරණි හඬට ජාතික පෙම පත අට ගෙන සින්දවමින්
විංකලයක හුලං ගහන ද්‍රෝහියන්ව බලා ගනින්
|
රතු කියන්නේ රතට මිසක වෙන පාටක් ලොවේ නොමැත
මැයි දිනයට පාට දුන්නෙ පහරන්නට නොව ඒ මත
නුඹලා ලඟ දනින් වැටුන පීඩිතයට මනස නොමැත
උන් ගලවා ගන්න පිණිස මැයි දිනයට හඬක් නොමැත
මෙල්ස් මාකැස්චේ | Mels Macasche
